Abakhohlakeleyo

Umhobe kaDavide; kumbhexeshi-kwayara.

1 Iziyatha zithi akukho Thixo ngandawo.

Zonakele, futhi zenza amasikizi;

akukho ulungisayo kuzo.

2 Ke yena *uNdikhoyo ubabukele abantu;

uhlel’ ezulwini efuna ukuqonda

ukuba ngaba sikho na isilumko,

nditsho ofuna ukunqula uThixo.

3 Kambe ke bonke bemkile,

xa bebonke bonakele;

kuba akakho olungisayo,

nditsho nokuba abe mnye.

4 Abanangqondo na abakhohlakeleyo;

abo baxhaphaza amawethu, ngathi batya isonka,

bangamnquliyo nokumnqula uNdikhoyo?

5 Baya kunkwantya benkwantyile,

kuba uThixo ukunye nâbo bamthobeleyo.

6 Nangona aminxwayo amacebo osizana,

nguNdikhoyo olixhadi lalo.

7 Akwaba ingavela eZiyon inkululeko yamaSirayeli,

akuba uNdikhoyo eyibuyisile inkqubela yabantu bakhe.

AbakwaYakobi baya kugcoba;

ewe, ochulumacha amaSirayeli.